ஸ்ரீ ஸத்யநாராயண வ்ரத பூஜை

ஸ்ரீ ஸத்யநாராயணன் என்பது ஸ்ரீ மஹாவிஷ்ணுவின் இன்னொரு பெயர். இந்த வ்ரதத்தை அனுஷ்டித்து பூஜை செய்யும் முறைகளை ஸ்காந்த புராணம் விவரிக்கிறது.

எப்போது செய்யலாம்?

பௌர்ணமியன்று ஸாயங்காலம் இந்த வ்ரதத்தை அனுஷ்டிப்பது உசிதம் என்கிறது ஸ்காந்த புராணம். பௌர்ணமியன்று செய்ய இயலாவிட்டால், அமாவாஸை, அஷ்டமி, த்வாதஸி திதிகளிலும், ஞாயிறு, திங்கள், வெள்ளிக் கிழமைகளிலும், ஸங்க்ராந்தி, தீபாவளி தினங்களிலும், புரட்டாசி சனிக்கிழமைகளிலும் செய்யலாம்.

உறவினர்கள், நண்பர்கள், தெரிந்தவர்கள் என நிறைய பேர்களை பூஜைக்கு அழைத்து உபசாரம் பண்ண வேண்டும்.

தேவையான சில முக்கிய ஸாமான்கள்.

• ஸ்ரீ ஸத்யநாராயணன் படம் தேவை.
• மூன்று கலஸங்கள் (அல்லது ஒரு குடம்)
• நவக்ரஹ பூஜைக்கு வேண்டிய வஸ்திரங்கள், தானியங்கள்
• பச்சைக் கற்பூரம், ஏலக்காய்
• புஷ்பங்கள் (நிறைய தேவைப்படும்)
• 9 கிண்ணங்கள்.
• அரிசி
• மற்ற, வழக்கமான பூஜை ஸாமான்கள்.

நிவேதனம்

• சால்யன்னம் (வெள்ளை சாதம்)
• க்ருதகுல பாயஸம் (பருப்பு பாயஸம்)
• மாஷாபூபம் (உளுந்து வடை)
• குடாபூபம் (அப்பம்)
• லட்டுகம் (இட்லி)
• சுண்டல்
• மோதகம்
• வாழை, இலந்தை, நாவல், கொய்யாப் பழங்கள்.

ரவா கேஸரியும் செய்யலாம்.

பூஜைகள்

முதலில் பூர்வாங்க பூஜையும், விக்னேஸ்வர பூஜையும் முடித்துக் கொண்டு,. அடுத்து ஸ்ரீ கணபதி முதல் பஞ்ச லோகபால பூஜையை முடித்து, பின்னர் நவக்ரஹ பூஜை தொடங்க வேண்டும். பின்பு இந்திரன் தொடங்கி அஷ்டதிக் பாலக பூஜை.

பின்னர் ஸ்ரீ ஸத்யநாராயண பூஜையை ஆரம்பிக்க வேண்டும். அங்க பூஜையும், ஸ்ரீ ஸத்யநாராயண அஷ்டோத்தரமும் செய்ய வேண்டும். அடுத்து, ஸ்ரீ லக்ஷ்மி அஷ்டோத்தரம். கடைசியாக ஸ்ரீமஹா விஷ்ணு ஸஹஸ்ர நாமாவளி சொல்லி புஷ்பங்களால் பூஜை செய்ய வேண்டும்.  தூபம், தீபம், நைவேத்யம், கற்பூர ஆரத்தி, மந்திர புஷ்பம், ப்ரதக்ஷிணம், நமஸ்காரம், ப்ரார்த்தனை, ஆரத்தியுடன் பூஜை நிறைவு பெறும்.

இறுதியில், பூஜை செய்து வைத்த சாஸ்திரிகள் (அல்லது வேறு யாராவது) ஸ்ரீ ஸத்யநாராயண வ்ரத மஹிமைகளைக் குறித்த கதைகளை சொல்லுவார்.

பூஜை முடிந்ததும் நைவேத்ய ப்ரஸாதங்களை பூஜை அனுஷ்டிப்பவர்கள் சாப்பிட்டு, பூஜைக்கு வந்திருக்கும் எல்லாருக்கும் அன்புடன் தரவேண்டும். காரணம், பகவான் அங்கு உள்ளவர்களில் யாராவது ஒருவராக அவதரித்து இருப்பார் என்பது நம்பிக்கை.

வந்திருக்கும் உறவினர்கள், நண்பர்களுக்கு விருந்து சாப்பாடு அளிக்க வேண்டும்.

ஸ்ரீ ஸத்யநாராயண வ்ரத பூஜை நிறைவு பெறுகிறது.

ஓம் ஸ்ரீ ஸத்யநாராயண நமோ நம:

வருஷந்தோறும் நீரஜா - அஷோக் இந்த பூஜையை செய்கின்றனர். நேற்று 29-மார்ச்-2010 (திங்கட்கிழமை) பண்ணினார்கள். வெகு விமரிசையாக நடந்தது. எல்லாருக்கும் நமஸ்காரங்கள் / ஆசிகள்

ராஜப்பா
11:20 காலை
30 மார்ச் 2010

You may visit  http://annavaramdevasthanam.nic.in/vratham.htm

**
**