பாத்ரமாத சுக்ல பக்ஷ சதுர்த்தியை விநாயக சதுர்த்தியாக கொண்டாடுகிறோம். அன்று காலை எழுந்து சுத்தமாக குளித்து விட்டு, வீட்டை பெருக்கி, மெழுக வேண்டும். வாசலில் மாவிலைத் தோரணம் கட்ட வேண்டும்.
ஒரு மண்டபம் அல்லது சுத்தமான ஒரு பலகையில் தலைவாழை இலை போட்டு அதன்மேல் நெல் அல்லது பச்சரிசி போட்டு பரப்பி, அதில் ஒரு தாமரையை வரைந்து, அதன் மேல் களிமண்ணால் ஆன பிள்ளையாரை வைத்து அருஹம்புல், சந்தனம் இன்னும் பலவித இலைகள், பூக்கள் ஆகியவற்றால் பூஜை செய்து, தூப, தீபம் காண்பித்து, நெய்யில் செய்த கொழுக்கட்டை (மோதகம்), மாவுப்பலகாரங்கள், தேங்காய், வாழைப்பழம், நாவல் பழம், விளாம்பழம், கொய்யாப்பழம், கரும்புத்துண்டு, வெள்ளரிக்காய், அப்பம், இட்லி, முதலானவற்றை நிவேதனம் செய்து, தீபாராதனை காட்டி பூஜையை முடிக்க வேண்டும்.
11-09-2010 சனிக்கிழமை காலை சுமார் 1010 மணி வரை திருதியை இருப்பதால், ராகுகாலம் சென்றபிறகு, 10-30க்கு மேல் விநாயகர் பூஜையை ஆரம்பிக்க வேண்டும்.
விநாயகருக்கு உகந்த 21 விதமான இலைகள்:
1. மாசிப்பச்சை, 2. கணடங்கத்திரி, 3.பில்வம், 4. அருஹம்புல், 5. ஊமத்தை, 6. இலந்தை, 7. நாயுருவி, 8. துளஸி, 9. மாவிலை, 10. அரளீ, 11. விஷ்ணுக்கிராந்தி,
12. மாதுளை, 13. நெல்லி, 14. மருக்கொழுந்து, 15. நொச்சி, 16. ஜாதி, 17. வெள்ளெருக்கு, 18. வஹ்ணி, 19. கரிசிலாங்கண்ணி, 20. வெண்மருதை, 21. எருக்க இலை.
இவற்றில் எட்டு இலைகள் (மஞ்சள் கலரில் உள்ளவை) எங்கள் வீட்டுத் தோட்டத்தில் இருக்கின்றன..
21 விதமான பூக்கள்:
1. புன்னை, 2. எருக்கு, 3. மாதுளை, 4. மந்தாரை, 5. மகிழம், 6. வெட்டிவேர், 7. பாதிரி, 8. தும்பை, 9. ஊமத்தை, 10. சம்பகம், 11. மாம்பூ, 12. தாழம்பூ, 13. முல்லை, 14. கொன்றை, 15. அருக்கு, 16. செங்கழுநீர், 17. செவ்வந்தி, 18. பில்வம், 19. அரளீ, 20. மல்லீ, 21. பவழமல்லி.
அப்பா, அம்மா, தம்பி, மாமா, மாமி என பலர் உள்ள ஒரு குடும்பத்தில் அனைவரையும் ஸந்தோஷப்படுத்த சுலபமான வழி என்ன தெரியுமா? அந்தப் பெற்றோரின் குழந்தையை த்ருப்தி செய்துவிட்டால் போதும்; எல்லாரும் சந்தோஷமாகி விடுவார்கள்.
அந்தக் குழந்தைதான் விநாயகர். பூஜை செய்து அவரை த்ருப்தி பண்ணி விட்டால், அப்பா-அம்மாவான சிவன்-பார்வதி, தம்பி முருகன், மாமா விஷ்ணு, மாமி மஹாலக்ஷ்மி எல்லாருமே ஸந்தோஷமாகி உங்களுக்கு அருள் புரிவார்கள். (ஸ்ரீ பரமாச்சிரியார் சொன்னது)
விநாயகரின் ஆசி, அருள் எல்லாருக்கும் கிட்டட்டும்.
ராஜப்பா
10-09-2010
12:25 பகல்
Comments